ყვითელი ამბები ყვითელი ფურცელი

რა აკავშირებს ქეთა თოფურიას ყოფილ ქმარს დონალდ ტრამპთან?

ქეთა თოფურიას პერსონა საკმაოდ დიდ ინტერესს იწვევს ქართულ და რუსულ მედიაში. მით უმეტეს, რომ ახალ-ახალი ამბები მის გარშემო არ ილევა. ამჯერად მისი ყოფილი ქმრის, ლევ გეიხმანის პერსონა გახდა განხილვის ობიექტი.

ქეთამ აღიარა ერთ-ერთ რუსულ გამოცემასთან, რომ ქმართან ოთხწლიანი ქორწინების პერიოდში მათი ურთიერთობები თანდათან გაცივდა და განქორწინებამდე თავისთავად, ბუნებრივად მივიდნენ. ეს გარკვეულწილად გამოიწვია იმანაც, რომ წყვილი ერთად ვერ ატარებდა ბევრ დროს – ლევი ამერიკაში ცხოვრობდა და საქმიანობდა, ქეთა – მოსკოვში და თვეში რამდენჯერმე ხედავდნენ ერთმანეთს.

მათი დაშორების შემდეგ, გარკვეული პერიოდი რუსულ პრესაში წერდნენ, რომ ეს მხოლოდ პიარი იყო და სინამდვილეში ქეთა კვლავ ქმართან ცხოვრობდა. იმასაც ამბობდნენ, რომ მხოლოდ სულელი დაცილდებოდა ისეთ გავლენიან და მდიდარ მამაკაცს, როგორიც გეიხმანია. თუმცა ფაქტია, განქორწინება მოხდა და ქეთასა და ლევის გზები გაიყო. ახლა მხოლოდ შვილთან დაკავშირებულ ღონისძიებებზე ხვდებიან ერთმანეთს და ოლივია ყველა უქმეებს მამასთან ატარებს.

ქეთასთან განქორწინების შემდეგ ლევი კვლავ ძველებურად აგრძელებს ცხოვრებას – ძირითადად ლოს-ანჯელესშია, იქ აქვს ბიზნესი, თუმცა ხშირად ჩამოდის მოსკოვში, სადაც ოლივიას გარდა, მისი უფროსი ქალიშვილი – სონია ცხოვრობს. სხვათა შორის, გერთან ქეთას შესანიშნავი ურთიერთობა ჰქონდა. უცნობია, ახლა თუ კონტაქტობენ.

ასევე რუსეთში ცხოვრობს სონიას დედა – ელენა კაზნაჩეევა, ლევ გეიხმანის პირველი ცოლი. სონია გარეგნულად დედას ჰგავს, რომელიც ასევე მშვენიერ ფორმაშია და როგორც მისი ინსტაგრამიდან ირკვევა, აქტიურ ცხოვრებას მისდევს, ბევრს ვარჯიშობს და მოგზაურობს. როგორც ჩანს, ყოფილ ცოლებს გეიხმანი ფინანსურად უზრუნველყოფილს ტოვებს.

ცნობილია, რომ ქეთას დიზაინერული სახლის აწყობაშიც ლევი დაეხმარა და ახლა მომღერალს საკუთარი სახელობითი სამოსის შექმნა და წარმოება რომ შეუძლია, ამაში მისი ყოფილი ქმრის წვლილი დიდია. მისი სამოსი სწორედ ამერიკულ ფაბრიკაში იკერება.

დიდხანს არ კონკრეტდებოდა, რას საქმიანობდა თავად ლევ გეიხმანი. 47 წლის ლევი მოსკოვშია დაბადებული. თავდაპირველად გამოგონებებით გაითქვა სახელი – ტექნოლოგიურ სფეროში კარგად იცნობდნენ. 2000 წლიდან დაიწყო მისი კარიერული წინსვლა – დამწყები ბიზნესმენი ენერგორესურსების გამოყენების სახელმწიფო ინსპექციის მეთაურად დანიშნეს. მაშინ “საპატიო მენავთობის” წოდებითაც დააჯილდოვეს.

მოგვიანებით ის ამერიკის შეერთებულ შტატებში გადაბარგდა და ამბობდა, რომ უცხოური საინვესტიციო ფონდის ინტერესებს წარმოადგენდა. “საკმაოდ მოკრძალებული წილი მაქვს ამ ფონდში, თუმცა ეს წილი ყოველწლიურად რამდენიმე მილიონი ევროთი მატულობს”, – განუცხადა წლების წინ ერთ-ერთ საინფორმაციო სააგენტოს.

ახლა კი აღმოჩნდა, რომ მისი კომერციული პარტნიორი დონალდ ტრამპის სიძეა – ივანკა ტრამპის მეუღლე ჯარედ კუშნერი. ლევს და ჯარედს ერთობლივი პროექტები აქვთ კალიფორნიაში, სამშენებლო, ინტერნეტ ტექნოლოგიებისა და სასოფლო სამეურნეო სფეროებში და სწორედ ამიტომაა, რომ გეიხმანი ფაქტობრივად გადაცხოვრდა ამერიკაში და დროის ძირითად ნაწილს იქ ატარებს.

 

მსგავსი მასალები